Поранешниот шеф на Google со морничаво предупредување: „Исклучете ја вештачката интелигенција!“

Три клучни промени кои водат кон супер-интелигенција

Шмит предупредува дека три големи технолошки скокови во моментов ја трансформираат вештачката интелигенција. Првата промена се значително поголемите „контекст прозорци“ кои овозможуваат задржување на огромни количества информации. Втората се специјализираните ВИ агенти, а третата е способноста на системите да претвораат обични текстуални инструкции во готов, функционален софтвер.

Според неговите предвидувања, овие промени ќе ѝ овозможат на технологијата да премине од обично одговарање на прашања кон самостојно решавање на екстремно сложени задачи во науката и медицината. Во рок од само пет години, ВИ ќе биде способна да спроведува решенија кои се состојат од над 1.000 логички чекори, при што резултатот од една задача автоматски ќе биде појдовна точка за следната.

„Ќе развијат сопствен јазик кој нема да го разбираме“

Најголемата загриженост на Шмит произлегува од моментот кога милиони специјализирани ВИ агенти ќе почнат да работат заедно. Овие агенти би можеле самостојно да поставуваат хипотези, да спроведуваат испитувања и да генерираат софтверски код без никаква човечка интервенција.

„Во рок од пет години, вештачката интелигенција би можела да обработува бесконечен контекст и да управува со милиони агенти што работат заедно. Со текот на времето, тие ќе го развијат својот јазик, а ние повеќе нема да разбираме што прават.“

Шмит смета дека комбинацијата од овие фактори ќе овозможи невидена соработка меѓу различните ВИ системи. Кога тие ќе станат доволно моќни да комуницираат на јазик кој е неразбирлив за човекот, според поранешниот шеф на Google, единственото преостанато решение ќе биде физички да се исклучат од струја.