ПОЧНА СТРАСНАТА СЕДМИЦА: Ова се НАЈВАЖНИТЕ ПРАВИЛА за последната недела од Велигденскиот пост!

Започна седмата и последна недела од Велигденскиот пост. Оваа недела е позната како Страсна или Страдална Седмица. Сите денови во неа носат назив Велики (Велики Понеделник, Велики Вторник итн.). Името доаѓа од старословенскиот збор „страст“, што значи страдање и трпение.

Оваа последна седмица се поминува во најстрог пост. Верниците најчесто јадат храна подготвена само на вода. Многумина постат уште построго. Јадат само леб, сол и овошје во многу мали количини. Масло и вино се дозволени само на Велики Четврток. На тој ден е востановена Светата тајна Причест.

Секој ден од Страсната Седмица има посебно значење. Во црковните книги се нарекуваат свети и велики. Тоа е поради големите настани што се случиле во тие денови. Велики Понеделник, Вторник и Среда се посветени на последните Христови беседи.

Со посебни молитви и сеќавања се издвојуваат последните три дена. На Велики Четврток се одбележува Тајната вечера. Во црквите престануваат да бијат камбаните. Наместо нив се користат дрвени клепала.

На Велики Петок црквата се сеќава на Христовите страдања. Од изведувањето пред Понтиј Пилат, до распнувањето и погребот. Ова е денот кога традиционално се вапцуваат велигденските јајца. На овој ден се практикува најстрогиот пост. Некои верници не јадат ништо цел ден. Други постат до изнесувањето на Плаштаницата (околу 15 часот).

Строг пост (сувојадење – леб и вода) или целосно воздржување се препорачува и за Велика Сабота. На овој ден се завршуваат сите подготовки за Велигден. Се меси и обреден колач (често нарекуван милиброд или козињак), украсен со вапцани јајца.

Во недела, верниците го слават Велигден (Воскресението Христово). Тоа е најголемиот и најрадосниот христијански празник.