Резервоар со 250 кубни километри вода стар 800.000 години се крие под Грција

Меѓународен истражувачки тим открил во Коринтскиот залив воден систем стар 800.000 години, со вода со низок салинитет складирана во седиментите под морското дно.

Истражувачите откриле дека таа се задржала уште од леденото доба. Тие се фокусирале на Коринтскиот залив, „едно од најдобро проучените подрачја на Медитеранот“ во поглед на тектонската активност.

„Тоа е геолошки активен раседен басен… кој доживеал значајни флуктуации на нивото на морето во текот на последните стотици илјади години, со што станал идеална природна лабораторија за проучување како настануваат и се одржуваат крајбрежните системи на подземни води со низок салинитет“, објаснила главната авторка на истражувањето, Сенај Хорозал.

Повеќе од само откритие – вода од леденото доба

Тимот идентификувал и мапирал води со низок салинитет складирани длабоко под дното на Коринтскиот залив. Се испоставило дека големите падови на нивото на морето за време на глацијалните периоди (ледените доба) овозможиле дождовницата и речните води да продрат во крајбрежните и подморските седименти, а дел од нив е зачуван до денес.

Оваа „слатка“ вода се наоѓа на длабочини од 20 до 700 метри под морското дно и се проценува дека во басенот може да има до 250 кубни километри од оваа древна подземна вода.

Како ја пронашле?

Тимот користел комбинација од сеизмички податоци, примероци од претходни дупчења и компјутерски симулации на последните 800.000 години. Симулациите потврдиле дека водата таму се таложела главно за време на ледените доба, кога нивото на морето било многу пониско. Присуството на непропустливи слоеви на седимент помогнало оваа вода да се зачува 800.000 години, иако со текот на времето делумно се мешала со морската вода.

Што значи ова за Грција?

Грција, како и многу медитерански земји, се соочува со сè поголем притисок врз водните ресурси. Ова откритие нуди нова надеж, но и претпазливост.

„Во контекст на климатските промени и растечката побарувачка за слатка вода, знаењето каде се наоѓаат овие водни тела е клучно за долгорочните стратегии“, истакнува Хорозал. Сепак, таа предупредува дека „на секоја потенцијална експлоатација треба да ѝ се пристапи многу внимателно, со оглед на чувствителноста на овие системи“.