Со трактор преорал 200 метри свеж асфалт: Штетата е 93.000 евра

Шеесетгодишен земјоделец од полскиот град Гливице е уапсен откако со трактор преорал околу 200 метри свежо поставен асфалт на улицата Рибачка во населбата Остропа.

Локалната управа за патишта ја проценила штетата на околу 400.000 злоти, односно приближно 93.000 евра.

Со трактор излегол на свежиот асфалт

Инцидентот се случил во петокот, кога земјоделецот со трактор „Урсус“ дошол до делницата на која неодамна бил поставен нов асфалт.

Наместо да помине по патот, тој започнал да го обработува со земјоделската машина и зад себе оставил околу 200 метри оштетена површина.

Тврдел дека патот е негов

Според главната полициска инспекторка Маржена Швед, мажот пред полицијата изјавил дека смета оти е сопственик на патот и дека градежните работи што се изведуваат таму се незаконски.

По инцидентот веднаш бил приведен, а случајот го презело обвинителството.

Може да добие до 10 години затвор

Земјоделецот е осомничен за уништување имот со значителна вредност. По разгледувањето на случајот, обвинителството побарало од судот да му одреди тримесечен притвор.

Обвинителот Милош Жимелка од Окружното обвинителство Гливице-Запад изјавил дека за делото за кое се товари е предвидена затворска казна од една до 10 години.