Трамп го претвора отпадот од Белата куќа во насип за голф-терен

Отпадот и шутот од Источното крило на Белата куќа, кое е урнато за да се направи место за планираната балска сала на претседателот Доналд Трамп вредна 300 милиони долари, наводно се возат на еден голф-терен во Вашингтон за чија обнова претседателот покажал интерес.

Камиони биле видени како превезуваат големи количини земја од местото каде што е урнато Источното крило, а потоа ја истоваруваат во паркот Ист Потомак, на островски терен долж реката Потомак, пренесува „Вашингтон Пост“.

Извор запознаен со проектот потврдил за весникот дека таа земја „ќе биде искористена за формирање насип на блискиот јавен голф-терен“, навел порталот „Медијајт“.

Новинарот Мартин Аустермајл го посетил теренот и известил дека бројни работници му потврдиле дека земјата потекнува од локацијата на Источното крило и дека се користи за „создавање нов релјеф на теренот“.

Повеќе од само отпад – терен со потпис на Трамп?

Откритието доаѓа два месеци откако „Политико“ објави дека Трамп планира обнова и ребрендирање на токму тој терен. Идејата наводно потекнала од еден член на персоналот, а Трамп ја прифатил така што потпишал рендер со златен логотип, налик на оние на неговите приватни клубови.

Предлогот за редизајн вклучувал и ново име: „Национален голф-терен Вашингтон“ (Washington National Golf Course). Локалитетот Ист Потомак работи врз основа на 50-годишен договор за закуп потпишан во 2020 година помеѓу Националната служба за паркови и непрофитна организација, што гарантира дека теренот ќе остане отворен за јавноста.