Хаос во САД: Нови 910 откажани летови, дефектот во контролата на летање продолжува

Преоптоварен систем и технички пропусти

Проблемите со воздушниот сообраќај не стивнуваат откако Федералната управа за воздухопловство (ФАА) во петокот нареди привремена обустава на летовите на сите аеродроми во земјата. Откако во петокот беа откажани над 9.000 летови, а во саботата повеќе од 6.400, денеска бројката на откажани летови изнесува најмалку 910, со тенденција на постојан раст според податоците на „ФлајтАвер“.

Берово те очекува

A Airbnb ◎ Instagram

Американскиот министер за транспорт, Шон Дафи, ги отфрли шпекулациите за сајбер-напад или поврзаност со вештачка интелигенција, нагласувајќи дека станува збор за технички проблем. Дефектот настанал при замена на застарените бакарни кабли со оптички влакна, при што инсталирањето на нов рутер довело до целосно преоптоварување на системот за контрола на летање. Дафи директно ја посочи телекомуникациската компанија Л3Харис за овој технички пропуст, а истрагата допрва ќе утврдува дали станува збор за неисправна опрема или грешка при инсталацијата.

Политичка бура и барања за одговорност

Додека администраторот на ФАА, Брајан Бедфорд, очекува системот целосно да се стабилизира до крајот на викендот, инцидентот предизвика силни политички реакции. Гувернерката на Њујорк, Кети Хочул, побара итна оставка од министерот Дафи или негово разрешување од страна на претседателот Доналд Трамп.

Хочул жестоко реагираше посочувајќи дека повторените проблеми со комуникациските системи и алармантниот недостиг од контролори на летање укажуваат на системски и сериозни пропусти во американското воздухопловство. Таа побара и конгресна истрага за хаосот, потсетувајќи дека во моментот на дефектот во петокот, дури 3.500 авиони веќе биле во воздух, ставајќи ги во ризик животите на патниците.

„Причината не е сајбер-напад, туку технички проблем при замената на застарените бакарни кабли со оптички влакна во телекомуникациската мрежа. По инсталирањето нов рутер дошло до преоптоварување на системот за контрола на воздушниот сообраќај.“ — изјави министерот Шон Дафи.