ЦРН БИЛАНС ЗА РУСИЈА: Потврден идентитетот на над 239.000 загинати руски војници во Украина.

Според деталната анализа на овие медиуми, меѓу идентификуваните жртви има различни категории на борци. Потврдено е дека животот го загубиле 87.749 волонтери, 26.416 затвореници регрутирани за војната и 19.778 мобилизирани војници. Исто така, официјално е документирана и смртта на 7.530 руски офицери.

Вистинскиот број на жртви веројатно е далеку поголем

Истражувачите од „Медиазона“ и Би-Би-Си предупредуваат дека реалниот број на загинати речиси сигурно е значително поголем, бидејќи верификацијата на идентитетот на жртвите е бавен и исклучително тежок процес.

Тие ги собираат своите податоци преку анализа на некролози, објави од членовите на семејствата на социјалните мрежи, извештаи во локалните медиуми и изјави од локалните власти во Русија.

Дополнителните одложувања во евидентирањето на мртвите се поврзуваат со поинтензивната употреба на беспилотни летала и промената на руската воена тактика, која сега се потпира на обиди за инфилтрирање со помали групи војници. Во вакви околности, телата на убиените понекогаш остануваат на бојното поле подолго време, што предизвикува големо доцнење во нивната идентификација и официјалната регистрација на смртта.

Од досега идентификуваните случаи, точниот датум на смртта е познат за 221.500 војници, што претставува околу 93 проценти од сите потврдени жртви.