АЛАРМАНТЕН СКОК ВО САД: Бројот на деца под 12 години кои примаат лекови за слабеење зголемен за над 300 пати!

Борба со екстремната дебелина кај најмладите

Опсежната студија, која анализирала податоци од над 3,5 милиони деца на возраст меѓу осум и 11 години, покажува дека процентот на препишани GLP-1 терапии скокнал од минимални 0,03 отсто во 2019 година на дури 9,3 отсто до јуни оваа година. Иако овие лекови сè уште не се официјално одобрени за употреба кај деца под 12 години, клиничките упатства во одредени случаи дозволуваат нивна примена кај пациенти со екстремна телесна тежина дури и од осумгодишна возраст. Резултатите се фрапантни – дури 94 проценти од децата кои ја примиле оваа терапија имале дијагностицирана тешка форма на дебелина, додека 65 проценти веќе развиле придружни заболувања како висок крвен притисок, покачен холестерол или апнеја при спиење.

Брзо ширење на трендот и повици за претпазливост

Во анализираниот период, над 20.000 деца станале корисници на лековите од групата GLP-1, меѓу кои најдоминантни биле популарните марки како Wegovy, Saxenda и Zepbound. Според д-р Бабак Оранди, водечки експерт во студијата, иако вкупниот број на деца на ваква терапија останува релативно мал, трендот на нејзината употреба се шири со неверојатна брзина низ целата земја. Тој силно апелира на потребата од континуирано и долгорочно следење на овие млади пациенти, со цел науката дефинитивно да потврди дали овие моќни лекови се вистински безбедни и ефикасни на долг рок.

„Лекарите и креаторите на здравствени политики имаат огромна одговорност да обезбедат овие вредни, а понекогаш и екстремно скапи лекови, да им бидат достапни и на оние кои немаат приватно осигурување или не можат да си дозволат специјализирани клиники“, изјави Алан Маси, коавтор на студијата.

Класни разлики и нееднаков пристап до лекови

Освен медицинскиот аспект, студијата објавена во престижното списание „Pediatrics“ вади на површина и еден сериозен социјален проблем. Анализирајќи ја националната база на податоци „Epic Cosmos“, истражувачите откриле дека децата од побогатите заедници имале дури 55 проценти поголема веројатност да добијат рецепт за овие лекови во споредба со нивните врсници од посиромашните средини. Овој податок јасно ја отсликува растечката нееднаквост во американскиот здравствен систем, каде модерните терапии за слабеење стануваат привилегија само за оние кои можат финансиски да ги издржат.