Владимирово се претвора во новата фолк сцена: Стартува „Фолк Фест Владимирово“ со директен пренос на МРТ1!

Со долги подготовки, силна поддршка и голема љубов кон македонската традиција, денеска – 29 мај (Спасовден) – официјално започнува првото издание на новиот фолк фестивал во Македонија „Фолк Фест Владимирово“.

Овој фестивал ветува да стане еден од најзначајните културни настани во регионот, поставувајќи го Владимирово на културната мапа на Балканот.

Генерална проба и Горан Алачки: Фестивалот оди на МРТ1!

Генералната проба за фестивалот се одржа денеска во 15:00 часот, каде сите изведувачи ги претставија своите песни пред големото фестивалско деби. Настанот се одвива во новоизградената фестивалска сала „Ванчо Чавдарски“, која неодамна се промовира како нов културен бисер на Малешевијата.

Идејниот творец на фестивалот, Горан Алачки, со видно возбудување, на својот Фејсбук профил напиша:

„Одиме на МРТ1 со директен пренос. Линкувани сме сателитски со Македонското радио и програмата за нашите сонародници во странство. На 29 мај, Владимирово ќе биде културна претставница на Балканот. Ќе нѐ слуша целата планета земја. Не можам ни јас да верувам… солзи радосници ми идат. Правиме многу голема работа“.

Легендите на македонската фолк сцена на фестивалската сцена

На фестивалската сцена вечерва ќе настапат некои од најистакнатите фолк уметници во земјава, вистински легенди на македонската музичка фолк сцена. Публиката ќе има можност да ужива во настапите на:

• Драган Мијалковски – „Тука сум роден јас“
• Круме Спасовски – „Мирна река тивко тече“
• Зуица Лазова – „Срце предавник“
• Горан Кукиќ – „Голем мерак имам јас“
• Жаклина Узунова – „Засекогаш“
• Благоја Грујовски – „Еј, жено ти“
• Ленче Кукиќ – „Ракија се пече“
• Наум Петрески – „Горо ле, горо“
• Ванчо Тарабунов – „Јован делија“
• Нино Величковски – „Стара ламба трепери“
• Перо Христов – „Лиљано моја“
• Виданка Георгиевска – „Наша Македонија“

Со силна визија, локална поддршка и автентична македонска музика, „Фолк Фест Владимирово“ го отвора патот кон нова ера на фолк фестивали, поставувајќи ја Малешевијата на културната мапа на Балканот. Не пропуштајте го директниот пренос на МТВ1 и Македонското радио, достапен и за македонските иселеници ширум светот.