Влезницата е вашата коса: гледачите мораа да ги избричат главите за премиерата

Необична сцена се случила во Лос Анџелес, каде што гледачите морале да ја избричат главата за да присуствуваат на специјалната проекција на филмот „Бугонија“ со Ема Стоун во главната улога.

Во пресрет на прикажувањето на филмот „Бугонија“, во фоајето на киното во Лос Анџелес била поставена фризерска маса за оние кои сакале да присуствуваат на проекцијата. Правилото било јасно: само оние кои се подготвени да се ишишаат „до кожа“ можат да влезат во салата.

Публиката спремно го прифатила овој предизвик, па многумина без размислување седнале на столот и им дозволиле на берберите целосно да ги трансформираат. Со смеа, аплаузи и снимки за социјалните мрежи бил забележан секој момент од овој необичен настан.

Повеќе од само маркетинг – инспирација од филмот

Овој промотивен перформанс го организирала компанијата „Focus Features“ по повод светската премиера на филмот. Идејата била инспирирана од сцена од самото остварување, во кое ликот на Ема Стоун, директорка на фармацевтска компанија, е киднапирана од двајца роднини кои веруваат дека таа е всушност вонземјанин. Во обид да го разоткријат нејзиниот вистински идентитет, тие одлучуваат да ѝ ја избричат главата, што станало симболичен мотив за целата промоција.

Ново ремек-дело на Лантимос и Стоун

Филмот „Бугонија“ повторно ја спојува Ема Стоун со грчкиот режисер Јоргос Лантимос, автор познат по необичните, провокативни приказни. Нивните претходни заеднички остварувања, „Кутри суштества“ и „Миленичка“, беа наградувани ширум светот, па и од „Бугонија“ се очекува да предизвика голем интерес. Публиката во регионот ќе може да го погледне филмот кон крајот на октомври.