„Господ прима и картички“: Италијанските цркви воведуваат ПОС терминали

Италијанските верници наскоро повеќе нема да мораат да бараат ситни пари по џебовите кога сакаат да дадат прилог во црква – дигиталната револуција го менува начинот на донирање.

Италијанските цркви влегуваат во дигиталната ера, а верниците сега ќе можат да даваат прилози со картичка или телефон. Проектот што ја поврзува традицијата и технологијата е заедничка иницијатива на „Banco BPM“ (како поддршка за Јубилејната година на Католичката црква во 2025) и компанијата „Numia“, во соработка со Италијанската бискупска конференција (CEI).

Целта е до крајот на 2025 година, во најпосетените цркви низ земјата да се постават 100 дигитални тотеми со POS уреди, кои ќе овозможат едноставно, брзо и безбедно донирање преку мобилен телефон или платежна картичка.

Како функционира системот?

Тотемите имаат интуитивен екран на допир. По пробната фаза спроведена во црквите во Милано, Асизи и Ватикан, уредите наскоро ќе бидат поставени во уште триесетина цркви. „Сакавме на црквите да им овозможиме современ и практичен начин за примање донации,“ вели Стефано Болис од „Banco BPM“. Епархијата од Верона веќе експериментира со донации од 1 до 50 евра. Слична иницијатива веќе постои во базиликата Свети Петар во Ватикан и во катедралите во Торино и Кремона.

Повеќе од само цркви – глобален тренд

Италија не е првата што воведува дигитални донации. Во Лондон, уличните музичари веќе со години примаат бесконтактни плаќања, додека во Кина, питачите во чашките ставаат QR-кодови за донации преку „Alipay“ или „WeChat Wallet“. Во САД, бездомник од Детроит познат како „Искрениот Ејб“ уште во 2016 година користел POS читач за собирање прилози со картички.

Апликацијата „Tucum“ го менува помагањето

Во Италија веќе функционира и апликацијата „Tucum“, која го пренесува милосрдието во дигиталното доба. Корисниците, верификувани од „Каритас“, добиваат картичка која не содржи пари, туку кредит што може да се искористи само во супермаркети, пекари и ресторани што учествуваат во програмата. Ова потсетува на наполитанската традиција „caffè sospeso“ – кафе платено однапред за оние што не можат да си го дозволат.

Од црквите до апликациите, технологијата го менува начинот на кој луѓето ја изразуваат солидарноста, носејќи поголема транспарентност и достоинство – и за оние што даваат и за оние што примаат.