Дали е ова крај за батериите? Кинезите имаат плазма мотор што работи на воздух

Кинеските научници развија плазма погонски систем кој функционира без потреба од гориво или батерија, што претставува револуционерен исчекор во областа на чистата енергија!

Иако сегашниот прототип е осмислен за употреба во воздухопловството, истражувачите веруваат дека оваа технологија во иднина би можела да се прилагоди и за копнени возила, вклучително и автомобили. Со овој проект, кој го води професорот Јау Танг од Универзитетот во Вухан, научниците создадоа алтернатива на традиционалните мотори, целосно отстранувајќи ја потребата од фосилни горива и батерии.

Како функционира овој мотор?

Наместо гориво, моторот создава плазма – јонизирана состојба на воздухот – користејќи микробранова енергија. Процесот се заснова на компресирање на атмосферскиот воздух, кој потоа се изложува на микробранови со фреквенција од 2,45 GHz, истата фреквенција што се користи во домашните микробранови печки. Таа постапка ги одвојува електроните од атомите, создавајќи плазма која генерира потисок. Системот притоа не произведува никакви емисии, чад или хемиски нуспроизводи.

Во раните лабораториски тестови, моторот успеал вертикално да подигне челична топка тешка еден килограм, докажувајќи дека потисок од плазма може да се произведе без согорување или батерии. Истражувачите тврдат дека нивото на потисок во иднина би можело да достигне сила на помали комерцијални млазни мотори.

Повеќе од само вселенска технологија

Плазма погонот се проучува со децении, главно во контекст на вселенските летала. Она што го прави овој систем единствен е фактот што ја користи Земјината атмосфера како погонски медиум. Клучната иновација лежи во способноста да се создаде потисок при нормален атмосферски притисок со помош на микробранова јонизација, што досега не било возможно.

Додека водородните горивни ќелии и батериските системи се водечки алтернативи, и двете технологии имаат ограничувања (водородот бара сложена инфраструктура, а батериите ја зголемуваат тежината). Плазма моторот кој не бара ниту едното ниту другото би можел да претставува „трет пат“ кон чист погон.

Сè уште е во експериментална фаза

И покрај ветувачките резултати, оваа технологија сè уште е во експериментална фаза. Сегашниот модел бара непрекинато напојување со микробранова енергија со висок напон, што претставува предизвик во поглед на зголемувањето на размерот, особено за поголеми авиони или возила. Истражувачите признаваат дека е потребен уште многу развој пред технологијата да стане комерцијално применлива, но го сметаат овој напредок за важен чекор кон мотори без емисии.