Детскиот џагор на игралиштата и смеата пред зградата, денес го замени тишината на екраните

Осаменоста веќе не е проблем само на возрасните. Таа сè почесто ги погодува и децата, а она што некогаш беше џагорот на игралиштата, денес го замени тишината на екраните.

Психијатрите предупредуваат дека расте генерација која „веќе не знае да се дружи“. Според податоците на истражувачкиот центар „Пју“, повеќе од 26 проценти од момчињата на возраст од 11 до 17 години се чувствуваат осамени поголемиот дел од времето. Истражувањата покажуваат дека секое трето дете воопшто не игра надвор во школските денови, а едно од пет ниту во текот на викендот.

Зошто децата се затворени дома?

Родителите, често водени од страв и недоверба кон околината, сè поретко им дозволуваат на децата самостојно да си играат надвор. Како што пишува социјалниот психолог Џонатан Хејт, авторот на книгата „Анксиозната генерација“, терминот „опасност од непознатите“ стана симбол на современото родителство. Стравот ги затвори децата во безбедни, но осамени домови.

Повеќе од само екрани – лажна слика за светот

Социјалните мрежи и видеоигрите ги заменија дворовите, но не донесоа блискост. Напротив, тие создаваат лажна слика за светот. Психологот Мајкл Роб предупредува дека повеќе од 70 отсто од момчињата редовно гледаат содржини што ја глорифицираат „машкоста без емоции“ (сила, надмоќ, пари). „Тоа создава ѕид“, вели тој. Момчињата почнуваат да веруваат дека покажувањето чувства е слабост, што ги оддалечува од другите.

Што можат да направат родителите? „Биди љубопитен, не лут“

Најважното што родителите можат да направат не е контрола, туку присуство. „Децата имаат потреба од подобра опција од интернетот. Тоа значи заедничко време, искрен разговор, заеднички оброк“, објаснува д-р Велес.

Психолозите советуваат родителите да воведат правило без екрани во спалната соба и да одредат време без телефони барем еден час дневно. Наместо лутина за тоа што децата гледаат, тие го препорачуваат пристапот: „Биди љубопитен, не лут“. Играта без телефон и времето поминато со други се најбрзиот лек против осаменоста.