Западен Нил се шири низ Европа, Македонија меѓу позасегнатите земји

Повеќе од 240 случаи на вирусот Западен Нил се потврдени низ Европа годинава, покажува најновиот неделен извештај на Европскиот центар за превенција и контрола на болести – ЕЦДЦ.

Најмногу случаи се регистрирани во Италија и Грција, а Македонија е меѓу земјите со повисок број пријавени заразени.

Италија и Грција со најмногу случаи

Според податоците на ЕЦДЦ, во Италија се регистрирани 139 случаи, додека во Грција се потврдени 61.

Во Шпанија се регистрирани 17 случаи, во Македонија 13 според европскиот извештај, во Романија шест, во Франција четири, а во Германија еден случај.

Во Македонија домашните институции бележат 20 случаи

Според последните информации со кои располагаат домашните институции, до вчера во Македонија биле регистрирани вкупно 20 случаи.

Разликата во бројките може да произлегува од различното време на ажурирање на европските и националните податоци.

Вирусот најчесто го пренесуваат комарци

Светската здравствена организација неодамна повика на зголемена претпазливост поради појавата на повеќе случаи во јужна Европа.

Вирусот Западен Нил обично циркулира меѓу птици и комарци, а заразените комарци можат да го пренесат и на луѓето.

Ризикот од заразување е најизразен во периодот од јули до септември, кога активноста на комарците е поголема.

Многу заразени немаат изразени симптоми

Според германскиот Институт „Роберт Кох“, голем дел од заразените лица не се ни свесни дека го имаат вирусот.

Поради тоа, експертите претпоставуваат дека реалниот број случаи може да биде повисок од официјално регистрираниот.

Кај потешките случаи може да биде зафатен нервниот систем

Кај мал дел од заразените, инфекцијата може да доведе до посериозни компликации и да го зафати нервниот систем.

Во такви случаи може да се појават состојби како енцефалитис или менингитис.

Во моментов не постои специфична вакцина или лек против вирусот Западен Нил, па медицинскиот третман е насочен кон ублажување на симптомите.

Како да се намали ризикот од каснување?

СЗО препорачува намалување на изложеноста на комарци, особено во периодите кога тие се најактивни.

Меѓу препораките се носење соодветна облека и користење средства против комарци, особено при престој на отворено.