Зетот на Трамп ќе го руши Генералштабот: Србија му го даде симболот на Белград на 99 години.

Српскиот парламент усвои закон со кој се отвора можност за реализација на контроверзен градежен проект во Белград предводен од Џеред Кушнер, зетот на Доналд Трамп.

Неговата фирма „Афинити партнерс“ сака да гради луксузен хотел и станбен комплекс на местото на некогашниот генералштаб на југословенската војска, кој беше бомбардиран од НАТО за време на воената интервенција во 1999 година. Иако уништена и напуштена оттогаш, зградата во центарот на градот има огромно симболично значење за Србите.

Вучиќ го поддржа проектот

Српскиот претседател Александар Вучиќ го поддржа проектот, и покрај протестите и правните пречки. Минатата година, српската влада го укина заштитениот статус на зградата и ја даде под 99-годишен закуп на Кушнер, кој планира развоен проект вреден 500 милиони долари.

„Важно е да се надмине товарот од 1999 година. Подготвени сме да изградиме подобри односи со САД“, изјави Вучиќ во јуни.

Опозицијата: „Обележјето ќе биде заменето со казина и џакузи“

Процесот беше во застој до вчера, кога партијата на Вучиќ предложи специјално гласање за расчистување на локацијата, кое помина во парламентот. Опозицијата реагираше бурно, велејќи дека одлуката е неуставна и криминална.

„Обележјето на градот ќе биде заменето со казина и џакузи“, рече опозицискиот пратеник Александар Јовановиќ. Според српските медиуми, Трамп уште пред да стане претседател размислувал да гради хотел во Белград.