Крајот на светот доаѓа порано, научниците имаат застрашувачка прогноза

Научниците од Јапонија и Соединетите Американски Држави со заедничко истражување се обидоа да одговорат на едно од најважните прашања на денешницата – колку долго Земјата уште ќе биде погодна за живот.

Иако на прв поглед потсетува на сценарио од научно-фантастичен филм, станува збор за сериозен научен проект кој го спроведоа истражувачи од Универзитетот Тохо и НАСА, користејќи ги притоа најнапредните суперкомпјутерски модели.

Според резултатите од истражувањето, Земјата би можела да стане целосно непогодна за живот многу порано отколку што досега се мислеше. Студијата под наслов „Идниот животен век на кислородната атмосфера на Земјата“ покажува дека иднината на нашата планета е нераскинливо поврзана со развојот и животниот циклус на Сонцето.

Сонцето како тивок убиец

Во текот на милијарда години, Сонцето постепено ќе се шири и ќе станува сè потопло, емитувајќи сè поголема количина на смртоносно зрачење кое Земјата полека ќе ја претвора во безживотна планета.

За прецизно да ја моделираат оваа далечна иднина, научниците спровеле повеќе од 400.000 компјутерски симулации. Резултатите предвидуваат дека Земјата ќе стане целосно негостољубива за отприлика една милијарда години. Тоа е драстично пократко во однос на претходните проценки кои на биосферата ѝ даваа уште околу две милијарди години живот.

„Долги години, животниот век на биосферата на Земјата се разгледуваше врз основа на постојаното засилување на сончевиот сјај“, изјави Казуми Озаки, водечкиот автор на студијата. Новите модели, сепак, тој период го скратуваат за отприлика половина. Според симулациите, за милијарда години океаните целосно ќе испарат, атмосферата ќе го изгуби целиот кислород, а површината на Земјата ќе стане вжештена пустелија на која ни најотпорните микроорганизми нема да можат да преживеат, пишува LADbible.

Повеќе од само далечна иднина – крајот за луѓето доаѓа многу порано

Сепак, за човечкиот вид и другите сложени организми, крајот доаѓа многу, многу порано. Суперкомпјутерските модели јасно покажуваат дека условите за живот драстично ќе се влошат многу пред океаните целосно да испарат. Интензивирачкото сончево зрачење ќе поттикне неповратни промени во атмосферата, вклучувајќи драстичен пад на нивото на кислород и екстремен пораст на температурите. Иако истражувачите не навеле специфичен датум за крајот на човечката цивилизација, тие предупредуваат дека еколошките услови ќе станат неодржливи за луѓето значително пред споменатиот рок од милијарда години.

Знаците се веќе тука

Научниците предупредуваат дека раните, суптилни знаци на овој долгорочен процес се веќе видливи. Зголемената соларна активност веќе влијае на магнетното поле на Земјата и постепено го намалува нивото на кислород во атмосферата. Кога овие природни циклуси ќе се искомбинираат со климатските промени предизвикани од човекот, се добива загрижувачка слика дека нашата планета полека ја губи својата рамнотежа. Крајот на животот на Земјата, како што предвидува оваа студија, нема да биде филмска катаклизма, туку бавен и неповратен процес на гушење на планетата.