Скутер паркиран на врв од мост, пожарникарите го симнуваа три часа

Граѓаните на Краков неодамна ги шокираше глетка на еден од градските мостови, каде непознат „шегаџија“ оставил електричен скутер на самиот врв, точно над реката Висла!

Бизарната приказна стана вирална, а фотографиите и снимките од „паркираниот“ двотркалец на висина од 40 метри предизвикаа лавина коментари. Повеќето се прашуваат како скутерот воопшто стигнал таму?!

Три часа го спуштаа скутерот

Полицијата добила пријава, по што на лице место била испратена патрола. Повикани биле и пожарникари, на кои им биле потребни три часа безбедно да го спуштат двотркалецот на земја. Полицијата за тоа време го обезбедувала теренот, а сега истрагата се фокусира на идентификување на лицето или лицата кои ја извеле оваа ризична и непромислена акција.

Според комесарот Пјотр Шпјех, портпарол на краковската полиција, непознатиот сторител го нарушил приватниот имот, бидејќи мостот е во сопственост на градскиот водовод.

„Можеше да падне и некого да убие“

Уште поважно, оставањето на електричен скутер на таква висина можело да доведе до тешки повреди или дури и смрт на минувачите доколку паднал.

„Некој во тој момент можел да се наоѓа точно под мостот и да настрада. Ова е крајно неодговорно и опасно однесување“, истакнал Шпјех. Непознатиот „шегаџија“ се соочува со затворска казна до три години.

„Овде не се работи за шега, туку за реална опасност и непотребно ангажирање на итните служби“, заклучил комесарот Шпјех.