Лажеле за Трамп, а сега и за климата? Британскиот сервис во најголемата криза досега.

Британската радиодифузна корпорација БИ-БИ-СИ покрена внатрешна истрага за начинот на кој известува за климатските промени и енергетската политика, по низата контроверзии и обвиненија за неточности и пристрасност.

Весникот „Телеграф“ објави дека Комитетот за уредувачки насоки и стандарди на БИ-БИ-СИ ќе спроведе „тематски преглед“ на известувањето за овие теми. Истрагата доаѓa по објавувањето на протечено писмо од Мајкл Прескот, поранешен советник за стандарди, кој изразил „очај поради неактивноста“ на раководството во однос на „широко распространетите докази за искривено известување“.

Минатата година БИ-БИ-СИ мораше да признае грешка кога во една статија било претставено како факт тврдењето дека екстремните температури се „35 пати поверојатно предизвикани од човечкиот фактор“. Исто така, имало обвиненија за погрешни тврдења во документарецот „Панорама“ и друг документарец за месо, кој бил отстранет по жалби.

Повеќе од само клима – истрага и поради монтираното интервју со Трамп

Новата ревизија доаѓа во период кога БИ-БИ-СИ повторно е под лупа – овојпат поради монтажата на интервју со Доналд Трамп во документарната програма „Панорама – Трамп, втора шанса“, емитувана во октомври 2024 година.

Во епизодата, делови од говорот на Трамп од 6 јануари 2021 година, кога неговите поддржувачи упаднаа во Конгресот, биле споени од различни делови на говорот, создавајќи впечаток дека тој директно ги поттикнал немирите. „Телеграф“ објави дека клиповите се монтирани така што да изгледа како Трамп да повикува на насилство. Поранешниот советник Прескот ова го нарекол „комплетно манипулирање со гледачите“. По аферата, неколку уредници поднесоа оставки.