Мерц од Црна Гора: Западен Балкан не смее да биде полигон за натпревар на големите сили

Мерц: Храбрите реформи се задолжителен предуслов

На завршниот настан од црногорското претседавање со Берлинскиот процес во Милочер, германскиот канцелар Фридрих Мерц истакна дека процесот веќе носи опипливи резултати за економијата и младите, но предупреди дека земјите мора да покажат политичка волја за владеење на правото.

Мерц порача дека дијалогот за нормализација меѓу Белград и Приштина мора итно да излезе од ќор-сокакот, додека во Босна и Херцеговина е потребна храброст за надминување на поларизацијата. Тој ја посочи руската агресија врз Украина како дополнителен аргумент за итноста на евроинтегративниот процес на Балканот.

Црногорски амбиции и надминување на споровите со Хрватска

Црногорскиот премиер Милојко Спајиќ ги презентираше амбициозните планови на Подгорица – затворање на клучните поглавја 23 и 24 во декември, завршување на преговорите до крајот на 2026 година и полноправно членство во ЕУ до 2028 година. За да го забрза патот, црногорската влада веќе направи отстапки кон Хрватска, преименувајќи го базенот во Морињ, кој претходно го носеше името на логорски чувар, и поставувајќи спомен-плоча.

Овие потези беа поздравени од хрватскиот премиер Андреј Пленковиќ, а германскиот канцелар Мерц изрази уверување дека преостанатите забелешки на Загреб нема да застанат на патот на црногорското членство во Унијата.

Австрија го презема кормилото, критики за Белград пред изборите

Австрискиот канцелар Кристијан Штокер најави дека Виена во 2027 година ќе го преземе претседавањето со Берлинскиот процес, со фокус на младите, помирувањето и постепеното интегрирање на регионот во единствениот европски пазар (СЕПА и роаминг).

Осврнувајќи се на претстојните парламентарни избори во Србија (25 октомври), Штокер упати критики кон претседателката на српското Собрание, Ана Брнабиќ, поради нејзиното протестно писмо до Европскиот парламент во кое го оспори составот на набљудувачката мисија.

„Земјите од Западен Балкан треба да ги решаваат проблемите, а не да создаваат нови. Затоа многу критички гледаме на оваа мерка и се надеваме дека ќе видиме независни и слободни избори во Србија. Западен Балкан не смее да стане место каде што големите сили се натпреваруваат за влијание; во наш заеднички интерес е патот неповратно да води кон ЕУ“, заклучија европските лидери.