„Мозочно мртов“, а сепак жив: Неверојатната приказна на човекот што ја победи смртта под лавина

Кога 27-годишниот Мет Потрац бил извлечен од снежна лавина, лекарите верувале дека сè е готово. На пат кон болницата еднаш починал, бил оживеан, а потоа прогласен за мозочно мртов.

Неговото семејство се собрало околу болничкиот кревет за да се прости. Но, токму тогаш, кога изгледало дека нема надеж – се случило чудо. Мет, кој бил врвен возач на моторни санки, во 2009 година бил затрупан од лавина, која му ја искинала кацигата и му ги наполнила дишните патишта со снег. Поминал вкупно пет часа под снегот и во транспорт, со повреди речиси неспоиви со животот.

„Мет, ако ме слушаш, отвори ги очите!“

Додека лекарите се подготвувале да прогласат смрт, пријателот на Мет, чувствувајќи дека тој е сè уште тука, му викнал да ги отвори очите. Иако очите останале затворени, капаците се поместиле, а Мет успеал да му ја стегне раката. Тоа бил почетокот на неговата борба. Имал скршен врат, здробена бутна коска, колабирано белодробно крило и тешка повреда на мозокот. Поминал 88 дена во болница, учејќи повторно да чита, пишува и зборува.

Повеќе од само преживување – болката што го донела до работ

Најтешкиот дел не биле скршениците, туку неподносливата невропатска болка во парализираната лева рака, која го довела до раб на самоубиство. Една ноќ, подготвен да си го одземе животот, го спречила помислата на неговиот син Итан и неговите зборови за загубеното куче.

По експериментална операција која ја запрела болката, Мет денес живее исполнет живот како мотивациски говорник и татко на седум деца. „Не би менувал ништо. Ни раката, ни лавината. Бидејќи ништо друго немаше да ме претвори во ваков човек“, вели тој.