Парадокс во Албанија: Кој ги протекува тајните од истрагата за протекување државни тајни?

Стотици пораки и запленети дијаграми

Специјалното обвинителство SPAK ја товари Хисени за откривање тајни податоци на бизнисменот Ергис Агаси. Но, она што ја шокираше јавноста е фактот што медиумите веќе објавија детали од околу 508 приватни комуникации меѓу нив двајца, кои датираат од крајот на јуни до апсењето на Агаси на 26 август.

Објавените материјали содржат информации за работната агенда на Хисени, нејзини средби со високи државни функционери и контакти поврзани со работата на SHISH. Истрагата добила на тежина откако во возилото на Агаси биле пронајдени девет страници со дијаграми и податоци за кои постои сомнение дека потекнуваат директно од разузнавачката служба.

„Хисени признала дека комуницирала со Агаси, но тврдела дека тој бил соработник на разузнавачката служба. Од друга страна, истражителите на SPAK се сомневаат дека тој всушност бил лице кое неовластено добивало чувствителни информации.“

Кој ги открива тајните на истрагата?

Уредникот на „Gazeta Tema“, Меро Базе, отворено го постави прашањето кое лебди во воздухот: како е можно детали од активна и исклучително чувствителна истрага, која ја засега националната безбедност, да стигнуваат до медиумите? Иако правото на информирање не се оспорува, апсурдно е истрагата за одлив на доверливи информации да произведува нов масовен одлив на информации.

Засега нема докази дали материјалите биле намерно доставени од структури во SPAK или од друг извор. Во меѓувреме, Специјалниот суд ѝ одреди мерка домашен притвор на Хисени (за која важи презумпцијата на невиност), а нејзиното сослушување е закажано за денес, 24 септември.