„ПЕКОЛНА“ ПЧЕЛА: Во Австралија откриен нов вид со рогови – ја крстија „Луцифер“

Австралиските научници открија нов вид на автохтона пчела со ситни рогови, на која ѝ го дадоа соодветното „пеколно“ име, Луцифер, објави Би-би-си.

Видот *Megachile lucifer* беше откриен од истражувачи додека набљудуваа ретко диво растение кое расте исклучиво во областа Бремер Рејнџс во Западна Австралија. Според водечкиот истражувач, докторката Кит Прендергаст од Универзитетот Куртин, „карактеристичните мали рогови“ се присутни само кај женките и би можеле да се користат за одбрана или за собирање материјали за градење гнезда.

Инспирација од Нетфликс и латинскиот јазик

Д-р Прендергаст објаснила како пчелата го добила своето име: „Кога го пишував описот на новиот вид, во тоа време ја гледав серијата на Нетфликс ‘Луцифер’ и името совршено се вклопуваше“. Сепак, таа додава дека името има и симболично значење. Луцифер, што на латински значи „носител на светлина“, според неа, ја симболизира потребата од „повеќе светлина“ (истражување) за заштита на австралиските пчели и загрозените растенија.

Повеќе од само откритие – повик за заштита

Студијата објавена во *Journal of Hymenoptera Research* ги повикува властите официјално да ја прогласат областа каде што е откриена пчелата за заштитено подрачје. Бидејќи новиот вид и загрозеното растение од кое зависи се наоѓаат на истата мала, незаштитена област, тие се изложени на ризик од уништување на живеалиштата поради рударски активности и климатските промени.

„Како резултат на тоа, може да губиме неоткриени видови… Ако не знаеме кои пчели постојат и од кои растенија зависат, би можеле да ги изгубиме и двете пред дури и да ги знаеме“, заклучи таа.