Пентагон ги откри тајните на „Темниот орел“: Хиперсонична ракета што стигнува од Лондон до Москва за помалку од 20 минути

Пентагон објави нови, досега непознати детали за американскиот хиперсоничен систем за оружје познат како „Темниот орел“ (Dark Eagle), кои излегоа на виделина за време на посетата на министерот за одбрана Пит Хегсет на базата Редстоун Арсенал во Алабама.

Генерал-потполковник Франциско Лозано откри дека овој мобилен ракетен систем (LRHW) има дострел од дури 3.500 километри, што е значително повеќе од претходно објавените бројки. Ова значи дека проектилот може да ја погоди континентална Кина од Гуам, Москва од Лондон или Техеран од Катар за помалку од 20 минути, движејќи се со брзина поголема од 5 маха.

Еден од најинтересните податоци е дека „Темниот орел“ носи исклучително мала боева глава од само 13,6 килограми (помалку од 30 фунти). Неговата разорна моќ не се должи на експлозивот, туку на огромната кинетичка енергија создадена при ударот со екстремна брзина. Системот е дизајниран да уништува високо вредни и добро заштитени цели, како командни центри и противвоздушни системи, и е речиси невозможен за пресретнување поради непредвидливото маневрирање.