Поплави во повеќе региони, 220 лица евакуирани во Кичево, критично во Форино

Обилните врнежи од дожд предизвикаа сериозни поплави во повеќе региони, а најкритично е во Кичево и во Полошкиот регион

Според информациите на Центарот за управување со кризи, во текот на ноќта биле регистрирани поплави во повеќе делови од земјата. Во Гостивар, противпожарните екипи интервенирале непрекинато, а најпогодено е селото Форино. Поплавени се и земјоделски површини во Чајле, Турчане, Врапчиште и Беловиште.

Во Кичево состојбата е особено сериозна. На улицата „Прилепска“ е регистрирано најголемо поплавување на куќи, при што се евакуирани 220 лица. Тие се сместени во спортската сала „Христо Узунов“, каде се обезбедени основни услови за престој.

Евакуации, поплавени болнички објекти и подруми

Во населбата Подварош, на улицата „29 Ноември“, поплавени се подруми во повеќе куќи. Дел од објектите на болницата во Кичево исто така се зафатени од водата. Со поддршка на Црвениот крст се организира достава на храна и вода за загрозените граѓани, додека на терен работат екипи од полицијата, комуналните служби и противпожарната единица.

Во Општина Липково, во селото Опае, излевањето на Слупчанска Река довело до поплавување на земјоделски површини, но засега нема пријавени материјални штети. Слична состојба е пријавена и во Оризаре. Во Куманово, кај локацијата Шупли Камен, се забележува насобран отпад кај мостот на Кумановска Река, но без опасност од излевање.

Следење на состојбата и нови ризици

Во Сарај состојбата е стабилна, додека во Зелениково е регистрирано минимално излевање на Вардар кај селата Пакошево и Ново Село, без непосредна опасност. Во Струмица засега нема пријавени штети, но евидентиран е одрон кај селото Суви Лаки кон Берово.

Во Пробиштип е пријавен прекин во снабдувањето со електрична енергија во селата Долни и Горни Стубол, а екипи на ЕВН работат на санирање на дефектот. Надлежните институции продолжуваат со мониторинг на состојбата, додека граѓаните се повикуваат на внимателност поради можност од нови врнежи.