Предмет падна од небо и собори момче на тротинет

Необична несреќа снимена во романското село Коменеаска предизвика бројни реакции откако видеото беше објавено во јавноста. На снимката се гледа како неидентификуван предмет паѓа од воздухот во близина на 12-годишно момче кое управувало електричен тротинет.

Инцидентот се случил на 29 мај, околу 14:45 часот, на патот ДН22 во округот Браила. Момчето се движело во правец од Римнику Сарат кон Браила кога ненадејно паднало на коловозот.

Момчето било пренесено во болница

По несреќата, малолетникот бил пренесен во болница каде што му била укажана лекарска помош. Полицијата соопшти дека при падот момчето се повредило, но не објави дополнителни детали за неговата здравствена состојба.

Според досегашните информации, камерите од соседството го снимиле моментот кога непознатиот предмет паѓа од височина непосредно пред момчето да ја изгуби контролата врз тротинетот.

Полицијата сè уште не потврдува што паднало

Новинарите побарале од полицијата да потврди дали момчето навистина било погодено од предмет што паднал од воздухот. Надлежните одговориле дека сите околности сè уште се проверуваат.

„Полициските службеници ја продолжуваат истрагата за со целосна сигурност да бидат утврдени сите околности под кои се случил настанот“, соопшти Полициската управа во Браила.

Случајот се води поради сомнение за нанесување телесна повреда од небрежност, додека потеклото и видот на предметот што се гледа на снимката засега остануваат непознати.