Што сè вети Орце Ѓорѓиевски освен чистење на ѓубрето?

‘Книгата со ветувања’ на Орце Ѓорѓиевски: Што сè добија скопјани освен ветувањето за чист град?

Орце Ѓорѓиевски е новиот градоначалник на Скопје, а својата победа ја извојува врз основа на ветувањето дека ќе го реши најголемиот проблем – хаосот со ѓубрето. Но, додека јавноста со право очекува итно чистење на преполните контејнери и консолидација на „Комунална хигиена“, ‘книгата со ветувања’ на новиот градоначалник е далеку подолга и поамбициозна. Ова се клучните проекти што Ѓорѓиевски им ги вети на скопјани во наредните четири години.

Од ‘Лимак’ до ‘Макотекс’: Решавање на сообраќајните црни точки

Еден од главните фокуси на Ѓорѓиевски е сообраќајот. Тој вети дека конечно ќе ја пушти во употреба подземната сообраќајница кај комплексот „Лимак“ – проект кој го ветуваа и Арсовска, и Шилегов, и Трајановски пред него. За да се случи тоа, ќе мора прво да ги изгради потребните кружни текови и да ги пресели бараките на железницата кај „Водњанска“.

Покрај ова, тој најави и проширување на улицата „Даме Груев“ (кај ‘Рекорд’) во булевар, тврдејќи дека има решение за деценискиот проблем со зградата на „Макотекс“ што го блокира проширувањето. Исто така, Ѓорѓиевски планира да ја активира и старата железничка линија од Драчево до Ѓорче Петров како еден вид градска железница за да се намали метежот.

Луна парк со ролеркостери, нов стадион во Шутка и дискотеки на периферија

Ѓорѓиевски вети и целосна ренесанса на забавниот и културниот живот. Неговото најголемо ветување е изградба на целосно нов, модерен Луна парк, кој го опиша како „современ забавен центар со европски стандарди“, вклучувајќи ролеркостери, водени атракции и зони со виртуелна реалност. Паралелно со ова, најави и целосна обнова на Зоолошката градина.

Во неговата програма се најде и ветување за изградба на голем стадион во Шуто Оризари, како и културен дом „Есма Реџепова“. Едно од поконтроверзните ветувања е планот за дислокација на сите дискотеки и ноќни клубови на периферијата на градот.

За младите, Ѓорѓиевски вети бесплатен оброк за секој средношколец и наградни патувања во Европа за првенците на генерација, додека за младите брачни парови вети 100% ослободување од комуналии доколку градат куќа. Листата на ветувања е долга, а очекувањата на граѓаните, по хаотичниот мандат на Данела Арсовска, се поголеми од било кога. Орце Ѓорѓиевски ќе има полни раце работа уште од првиот ден.