75 години „Танец“ – чуварот на македонскиот идентитет и традиција

Најпознатиот македонски фолклорен ансамбл „Танец“ слави 75 години од своето основање, продолжувајќи да ја пренесува македонската култура на глобалната сцена. Со над 5.000 концерти на сите континенти, „Танец“ е еден од најголемите амбасадори на македонската култура и традиција, збирајќи признанија и восхит низ целиот свет.

Преку повеќе од 90 кореографии, ансамблот го претставува богатството на македонската културна различност, покривајќи традиции од сите делови на земјата. На сцена, „Танец“ ги комбинира енергичните танци, уникатните носии, песните и звуците на македонските народни инструменти, создавајќи неповторлив спектакл кој остава траен впечаток на публиката.

За првпат на чело на „Танец“ стои жена – Весна Митевска, која како долгогодишен член на ансамблот и исклучителен познавач на традиционалната музика, работи на исполнување на еден важен сон: да обезбеди матична сцена за „Танец“ во Скопје, каде ансамблот ќе може да настапува редовно.

По повод овој значаен јубилеј, во декември „Танец“ ќе одржи специјален концерт во чест на своите седум и пол децении посветени на македонскиот фолклор и традиција.