ЕК ја „спушти топката“: Средбата меѓу Вучиќ и Фон дер Лајен во Њујорк била сосема случајна и ненајавена

Брисел со јасно појаснување: Случајна средба на маргините

Портпаролката на Европската комисија, Аријана Подеста, на редовната прес-конференција стави крај на шпекулациите околу тежината на овој дипломатски контакт, истакнувајќи дека станува збор за изолиран и кус момент без формална агенда.

„Тие се сретнаа случајно и накратко на маргините на Генералното собрание на ОН. Тоа беше спонтана средба, еден од многу ретките вакви случаи, па затоа немаме што да додадеме освен она што веќе го кажавме. Средбата беше многу кратка, спонтана и ништо повеќе од тоа“, изјави портпаролката Подеста.

Српскиот претседател на својот Инстаграм профил веднаш сподели фотографија од ракувањето, наведувајќи дека ѝ изразил „искрена благодарност за сè што направила за Србија во изминатите години“. Сепак, Фон дер Лајен воопшто не го спомена овој разговор на своите официјални канали, иако редовно објавуваше детали од сите останати состаноци во Њујорк.

Фон дер Лајен доаѓа на Балканот, но ја заобиколува Србија

Овој неформален контакт добива дополнителна тежина со оглед на претстојната балканска турнеја на шефицата на Европската комисија. Фон дер Лајен следната недела ќе отпатува во регионот во рамките на традиционалната годишна посета на Западен Балкан, но на нејзината рута нема да бидат Србија и Босна и Херцеговина.

Од Европската комисија образложија дека причината за ваквата одлука е исклучиво протоколарна, односно фактот што во двете земји во моментов се во тек активни предизборни кампањи за парламентарните избори.