Нови правила за клиентите на „АЛТА банка“: Лимит од 10.000 денари неделно за граѓаните, стопирани надворешните плаќања за фирмите

Ограничувања за граѓаните и фирмите

Во периодот на привремената администрација, средствата на сите клиенти остануваат безбедни на нивните сметки, но се воведуваат ограничувања за да се спречи нагло одлевање на ликвидноста. За физичките лица е утврден неделен лимит од 10.000 денари. Овие средства можат да се користат преку банкарските картички за подигање готовина од банкомати и за плаќање во трговската мрежа. Внатрешните трансакции кон други лица во рамките на истата банка остануваат неограничени.

За правните лица (фирмите) важат построги правила. Тие ќе можат да вршат неограничени внатрешни плаќања во рамките на „АЛТА банка“, но целосно им се блокирани надворешните трансфери преку домашните платни системи. Исто така, на правните лица привремено им е оневозможено повлекувањето готовина од шалтерите и банкоматите.

Меѓународни трансакции и осигурени депозити

Што се однесува до платниот промет со странство, приливите преку СЕПА системот и кореспондентското банкарство ќе се одвиваат нормално и без пречки. Меѓутоа, одливните плаќања кон странство се привремено стопирани и за физичките и за правните лица. Истовремено, од Народната банка потсетуваат дека сите кредитокорисници имаат законска обврска редовно да ги исплаќаат своите рати кон банката.

„Штедните влогови на физичките лица се целосно безбедни и се осигурени преку Фондот за осигурување депозити во износ до 30.000 евра, согласно законските прописи. Апелираме граѓаните да не носат избрзани одлуки бидејќи масовното повлекување средства не е во интерес на штедачите“, порачуваат од Централната банка.