Алармот е вклучен: 46% од младите во Македонија не веруваат дека ЌЕ ВЛЕЗЕМЕ ВО ЕУ

‘Зошто да чекам нешто што нема да се случи?’: Анкетата што го вклучи алармот во Брисел – половина од младите во Македонија не веруваат дека некогаш ќе влеземе во ЕУ

Нова, алармантна анкета открива длабок јаз помеѓу желбите и реалноста кај младата генерација во Македонија. Иако мнозинството млади луѓе сè уште гледаат позитивно на Европската Унија, речиси половина од нив (46,5%) се целосно песимисти и не веруваат дека државата *некогаш* ќе стане членка. Овој растечки евроскептицизам е документиран во новата публикација „Справување со младинскиот евроскептицизам на Западниот Балкан“, која покажува дека младите се уморни од чекање и разочарани од домашните елити.

Истражувањето, спроведено во јуни 2025 година меѓу 1.000 млади луѓе (од кои 81,5% студенти), покажува дека надежта е речиси исчезната. Само 6,7% од испитаниците очекуваат членство во следните пет години, додека 35,8% сметаат дека тоа е можно, но во некоја далечна, неодредена иднина.

Виновникот не е во Брисел, туку во Скопје: Корупцијата како ‘убиец’ на европската иднина

Она што е особено поразително за домашните политички елити е што младите не ја гледаат ЕУ како проблем. Напротив, тие се главно позитивно (41%) или неутрално (35%) настроени кон неа. Вистинскиот виновник за нивниот песимизам лежи дома. На прашањето „Која е главната пречка за интеграцијата?“, одговорот е брутално јасен: корупцијата, која ја посочиле дури 84,6% од испитаниците. Далеку зад неа се билатералните спорови (61%) и ниската доверба во институциите (60%).

Ова покажува дека младите не се против ЕУ; тие се против домашниот систем кој не успева да ги испорача основните европски вредности, пред сè, владеењето на правото. „Овој јаз помеѓу надежта и реалноста, интересот и недовербата ја формира основата на младинскиот евроскептицизам“, се заклучува во публикацијата.

Апатија, немоќ и поглед кон Албанија

Истражувањето открива уште еден загрижувачки феномен: длабока апатија. Над 70% од младите се изјасниле како „општествено неактивни“, а само 8% учествуваат во било какви граѓански или политички иницијативи. Ова, според авторите, укажува на „широко распространето чувство на немоќ“ – младите едноставно не веруваат дека можат да променат нешто.

Колку е длабока кризата на довербата во сопствената држава покажува и одговорот на прашањето кој има најголеми шанси да влезе во ЕУ во следните пет години. Дури 53% од младите Македонци веруваат дека тоа е Албанија, потоа Црна Гора (34,5%). Само 8,2% веруваат во сопствената земја.

Според Бојан Кордалов, еден од авторите, овие резултати се аларм за Брисел, но уште повеќе за Скопје. „Ако младите не добијат реални можности, тие ќе престанат да ја гледаат иднината на својата земја во ЕУ“, вели тој. Пораката е јасна: младите сакаат европски вредности (можности за работа, образование, човекови права, чиста околина), но ако државата не може да им ги испорача, тие својата европска иднина ќе ја побараат надвор од неа – со бугарски пасош или работна виза, оставајќи ја земјата со празни ветувања и уште попразни градови.