Албанија нè остави далеку зад себе: Отворен и последниот ЕУ кластер за само ЕДНА година

Албанија ‘спринта’ кон Брисел, ги отвори сите 6 кластери за само една година

Во импресивен приказ на брз напредок во евроинтеграциите, Албанија денеска го отвори и последниот, шести кластер од пристапните преговори со Европската Унија. Овој потег ја става Тирана цврсто на патот кон остварување на својата амбиција – полноправно членство во ЕУ до крајот на оваа деценија. Новиот кластер, насловен „Ресурси, земјоделство и кохезија“, опфаќа клучни области како земјоделството, рибарството и безбедноста на храната.

Отворањето беше поздравено од данското претседателство со ЕУ. „Проширувањето е геополитичка неопходност за ЕУ и клучен приоритет за данското претседателство. Денешниот чекор на отворање на последниот преговарачки кластер со Албанија ја покажува посветеноста на земјата кон понатамошно унапредување на својот пат кон членство во ЕУ“, изјави Мари Бјер, данската министерка за европски прашања.

Лекција по брзина: Како Албанија нè остави зад себе

Она што е фасцинантно во случајот на Албанија е брзината со која се одвива процесот. Земјата доби кандидатски статус во 2014 година, во ист пакет со Македонија. Сепак, нивните патишта се раздвоија кога Бугарија ја блокираше Македонија поради историскиот и јазичниот спор.

Додека Македонија беше заглавена, Тирана го отвори својот прв кластер дури во октомври минатата година. Ова значи дека Албанија успеа да ги отвори сите шест преговарачки кластери за нешто повеќе од една година – темпо кое е речиси невидено во поновата историја на проширувањето на ЕУ.

2027 крај на преговори, 2030 членство?

Овој забрзан напредок е во согласност и со последниот извештај на Европската комисија за проширувањето. Во него, Албанија, заедно со Црна Гора, добија најповолни оценки од сите земји кандидати. Извештајот сугерираше дека доколку Тирана го задржи ова темпо на реформи, таа би можела технички да ги заврши преговорите до 2027 година, што го прави членството до 2030 година реална и остварлива цел.

Овој импресивен напредок на Албанија е најјасниот доказ досега дека процесот на проширување е повторно жив, барем за оние кои се подготвени да ги испорачаат бараните реформи. Отворањето на сите шест кластери за толку краток период е темпо кое малку кој го очекуваше и ја позиционира Тирана како најсериозен кандидат да стане 30-та или 31-та членка на Унијата до крајот на оваа деценија.