Весна Љ.
Успешно заврши спасувачката акција за извлекување тројца планинари од планината Бистрица, откако групата побарала помош преку бројот за итни случаи 112.
-
La Linea v8
699 ден
524.25 ден
Пријавата била примена во 18:46 часот во Регионалниот центар за управување со кризи во Тетово. Планинарите се наоѓале на тежок и непристапен терен, од каде што не било можно извлекување со теренско возило.
Еден планинар почувствувал сериозни тегоби
За време на движењето, еден член на групата почувствувал болки во градите, отежнато дишење и тешкотии при одењето.
Никој од тројцата не бил повреден, но здравствената состојба на планинарот и оддалеченоста на локацијата наложиле итно организирање спасувачка акција.
До местото можело да се стигне само пеш, при што биле потребни најмалку три до четири часа движење.
Вклучени повеќе служби
Центарот за управување со кризи воспоставил координација со СВР Тетово, Итната медицинска помош, Дирекцијата за заштита и спасување и Националниот парк „Шар Планина“.
Во акцијата бил вклучен и алпинист-спасител од Тимот за брза интервенција и спасување во планина, кој веднаш се упатил кон локацијата на групата.
Во текот на целата интервенција била одржувана постојана комуникација со планинарите и со сите надлежни служби.
Планинарите пеш стигнале до безбедна точка
Откако спасителот пристигнал до групата, во консултација со екипата на Итната медицинска помош била проценета состојбата на лицето.
Било утврдено дека планинарот може да се движи со придружба, по што тројцата биле безбедно доведени до пристапна локација.
Таму ги пречекале полициски службеници и медицинска екипа, а потоа биле транспортирани до Клиничката болница во Тетово.
Пуштени на домашно лекување
Подоцна, Полициската станица Теарце потврдила дека планинарите безбедно пристигнале во селото Лешок.
По лекарските прегледи било констатирано дека немаат повреди. На лицето со здравствени тегоби му била укажана медицинска помош, по што тројцата биле пуштени на домашно лекување.
