Левица удира по власта: „Артан Груби е на чекор до слобода“

Левица обвини дека сè уште нема обвинение против Артан Груби, иако од ВМРО-ДПМНЕ уште во февруари најавувале дека судскиот процес наскоро ќе започне.

Од партијата тврдат дека токму Груби со години бил користен како симбол на неказнивоста, а сега, според нив, случајот се претвора во политички товар за власта.

Левица: Од најави за правда до отсуство на обвинение

„Партијата што уште во февруари триумфално прогласи дека судскиот процес за Артан почнува, денес има мал проблем – судски процес нема, затоа што обвинение сè уште нема“, велат од Левица.

Партијата обвинува дека предизборните најави за расчистување со „крупните риби“ не добиле соодветен судски епилог.

Остри реакции и за куќниот притвор

Левица реагира и на одлуката Груби да биде во куќен притвор, наместо во затворски притвор.

Според нивното соопштение, кога Груби повторно се појавил на граничен премин, очекувањата биле институциите да постапат поинаку, но по неколку часа тој бил испратен во куќен притвор.

Од Левица тврдат дека при одлучувањето биле земени предвид безбедносни информации од МВР и АНБ, а токму тоа го користат како аргумент во својата критика кон власта.

22 август како важен рок

Според Левица, актуелната мерка куќен притвор истекува на 22 август, а Обвинителството сè уште не соопштило дали ќе биде поднесен обвинителен акт.

Партијата потсетува дека, според нивните наводи, уште во февруари било соопштено дека најголемиот дел од доказите во случајот биле обезбедени.

„Груби беше симбол на неказнивоста“

Левица оценува дека ВМРО-ДПМНЕ со години го користела Артан Груби како пример во критиките кон ДУИ и како аргумент во своите ветувања за борба против криминалот и корупцијата.

„ДПМНЕ го користеше Груби како доказ зошто мора да дојде на власт, па кога дојде – успеа сопствените закани и ветувања да ги претвори во карикатура“, се наведува во реакцијата на Левица.