„Најдете си адвокати“: Демократот Гарсија со остра порака до Трамп по преземањето на Конгресот

Мети на новите парламентарни истраги

Со убедливата победа на меѓуизборите и освојувањето на мнозинството во Сенатот и во Претставничкиот дом, демократите добиваат сериозни лостови на моќ. Тие сега имаат овластувања да покренуваат парламентарни истраги против администрацијата на Трамп, да повикуваат сведоци и да бараат доверливи документи преку задолжителни судски покани.

Гарсија, кој застанува на чело на едно од најважните истражни тела во Конгресот, веќе ги најави приоритетите на новите истраги. Меѓу нив се улогата на милијардерот Илон Маск и неговиот новоформиран Оддел за владина ефикасност (DOGE), деловните трансакции на семејството Трамп, постапувањето на имиграциската служба ИЦЕ, како и доверливите документи поврзани со случајот на осудениот сексуален престапник Џефри Епстин.

„Судски покани“ и крај на политичкиот комфор

Во офанзивата се вклучи и влијателниот демократски сенатор Рон Вајден, кој треба да го преземе Комитетот за финансии во Сенатот. Тој преку социјалната мрежа Икс испрати куса, но јасна порака објавувајќи само еден збор – „Судски покани“, со што најави засилена контрола врз финансиските активности на администрацијата.

Со губењето на контролата во двата дома на Конгресот, завршува периодот во кој Трамп можеше да се потпре на поддршката на републиканското мнозинство. Во преостанатите две години од неговиот мандат, Белата куќа ќе се соочува со континуирани парламентарни истраги, сослушувања и блокади на законодавните иницијативи.

„Не почнуваме од нула. Зад нас има огромна јавна работа, но и многу работа што тивко ја подготвувавме со месеци. Имаме овластувања да одиме на суд во име на Претставничкиот дом, имаме моќ да повикуваме сведоци и да покренуваме постапки за непочитување на Конгресот“, изјави Гарсија за „Панчбоул њуз“.