Ноќеска уапсени двајца Турци, во возило најдени четири мигранти од Египет на автопатот Гевгелија–Скопје

Ноќна акција на полицијата на автопатот Гевгелија, Скопје заврши со апсење на двајца турски државјани, откако во возило биле пронајдени четири илегални мигранти од Египет

Според информациите, приведени се лицата С.А.О. (35) и К.Х. (32), двајцата државјани на Република Турција, под сомнение за кривично дело криумчарење мигранти. Настанот се случил околу 02:30 часот на автопатот Гевгелија–Скопје, кога полициски службеници од граничната полиција Богородица запреле патничко моторно возило „Шкода Октавија“ караван со скопски регистарски ознаки, сопственост на рент-а-кар компанија, управувано од С.А.О., а како сопатник бил К.Х.

При преглед на возилото, според МВР, биле пронајдени четири илегални мигранти од Египет, на возраст од 15 до 35 години. По наредба на јавен обвинител, двете лица се задржани во Полициската станица Гевгелија, додека мигрантите се сместени во Прифатно-транзитниот центар „Винојуг“.

Следуваат постапки по наредба на обвинителство

Од институциите најавуваат дека по целосно документирање на случајот, против осомничените ќе биде поднесен соодветен поднесок. Истрагата треба да утврди како е организиран транспортот, дали има други лица вклучени, и дали ваквата рута била користена и претходно.