„Ова е масакр!“: Лула бара истрага за полициската акција во Рио со 121 жртва

„Се случи масакр и мислам дека е важно да се утврдат околностите под кои се случи“, изјави бразилскиот претседател Лула да Силва во врска со полициската акција во Рио де Жанеиро во која загинаа 121 лице.

Во полициската акција минатата недела, насочена кон нарко-бандата „Црвена команда“ (Comando Vermelho), илјадници полицајци беа вклучени во судири со тешко вооружени мажи во камуфлажни униформи.

Бандите користеле дронови за фрлање бомби

Она што е особено загрижувачко е новиот тренд на војување на бандите. „Употребата на беспилотни летала за фрлање бомби сега е тренд меѓу тешко вооружените криминални групи“, рече Карлос Солар од Кралскиот институт за одбранбени студии.

Репортерот за криминал Рафаел Соарес изјави дека „Црвената команда“ е во офанзива во Рио во последните години, враќајќи ја територијата што претходно ја изгубила.

Повеќе од само жртви – хорор сцени и поделена јавност

Битката ги разоткри хроничните безбедносни проблеми на градот и длабоките поделби околу тоа како да се решат. Додека активистите за човекови права ги осудија ужасните слики од мртви тела расфрлани по улиците, анкетите покажаа дека многу граѓани, здодеани од криминалот, ја поддржуваат полициската операција.

Фотограф кој бил сведок на последиците, Бруно Итан, опишал морничави сцени: „Телата постојано се појавуваа. Имаше 25, 30, 35, 40, 45…“ Тој рекол дека меѓу телата имало и тела на полицајци, едно од телата било обезглавено, а другите биле „целосно осакатени“ со убодни рани.

Полицијата: 99 од мртвите беа „криминалци“

Началникот на цивилната полиција на Рио, Фелипе Кари, им рече на новинарите дека полицајците досега ги идентификувале телата на 99 „криминалци“ меѓу мртвите, од кои 42 имале потерници, а 78 имале обемни криминални досиеја.

И покрај критиките дека неговата администрација е „премногу блага кон криминалот“, Лула рече дека поднел закон до парламентот со кој се предлага минимална затворска казна од 30 години за членовите на бандата.