Трамп ја крши традицијата: Ќе ѝ продаде Ф-35 на Саудиска Арабија?

Администрацијата на американскиот претседател Доналд Трамп го разгледува барањето на Саудиска Арабија за купување на 48 најмодерни борбени авиони F-35 Lightning II, во потенцијален договор вреден милијарди долари.

Оваа продажба ќе означи значајна промена што може да ја промени воената рамнотежа на Блискиот Исток. Таа, исто така, ја тестира долгогодишната политика на Вашингтон за одржување на „квалитативната“ воена предност на Израел, кој досега е единствената земја во регионот што ги поседува овие авиони.

Според изворите на Ројтерс, Саудиска Арабија се обратила директно до претседателот Трамп, истакнувајќи дека одамна е заинтересирана за набавка на авионите на „Lockheed Martin“. Пентагон во моментов ја разгледува потенцијалната продажба.

Повеќе од само авион – стратешки систем

F-35 Lightning II е борбен авион од петта генерација со напредна „стелт“ технологија, дизајниран да извршува широк спектар на мисии – од контрола на воздушен простор до напади на копнени цели. Тој веќе е во употреба во повеќе сојузнички земји на САД, вклучувајќи ги Велика Британија, Израел, Јапонија и неколку европски земји.

Кралското саудиско воздухопловство веќе важи за најдобро опремено и обучено во арапскиот свет, располагајќи со модерни авиони како F-15, Eurofighter Typhoon и Panavia Tornado. Доколку се реализира оваа продажба, Саудиска Арабија ќе стане првата арапска држава што го поседува овој најсовремен борбен систем.