Пилешка Алфредо лазања: Кремасто совршенство со три вида сирење за денови кога калориите не се бројат

Класичната лазања речиси и да не може да биде погрешен избор за семеен ручек, но постои верзија која целосно ја менува добро познатата комбинација и наместо доматен сос и мелено месо носи нешто далеку покремасто и поразлично – сочна, зачинета пилешка лазања со рикота, моцарела, пармезан и богат Алфредо сос.

Станува збор за пилешка Алфредо лазања, раскошно јадење кое е некаде на границата меѓу класичната лазања и пастата Алфредо, со слоеви тестенина, нежно пилешко месо и густа сирна смеса што при печењето се претвора во неверојатно кремаста целина.

Ова дефинитивно не е лесен ручек, ниту пак рецепт за оние денови кога внимателно се пресметува секој внесен грам, но токму затоа е совршен избор кога сакате богат, заситувачки и вистински утешен оброк кој без многу двоумење ќе го собере целото семејство околу масата.

Состојки

За пилешкото:

• 2 пилешки филети, истенчени
• 2 лажички лук во прав
• 2 лажички кромид во прав
• 2 лажички мелена црвена пиперка
• 2 лажички италијанска мешавина од зачини
• 1 лажица сол, или помалку по вкус
• 1 лажичка црн бибер
• сок и рендана кора од половина лимон
• 1/4 лажичка чили во прав

За Алфредо сосот:

• 115 г путер
• 5 чешниња лук
• 700 мл павлака за готвење
• 200–220 г рендан пармезан
• 1 лажичка италијанска мешавина од зачини
• сол и бибер по вкус

За кремастиот слој со сирење:

• 425 г рикота
• 100 г рендана моцарела
• 50 г рендан пармезан
• 1 јајце
• 1/2 лажичка црн бибер
• 1/2 лажичка лук во прав

Потребни се и околу 20 листови за лазања, како и дополнителна количина моцарела и пармезан за завршниот слој.

Подготовка

Пилешките филети најпрво истенчете ги, а потоа добро зачинете ги со лук во прав, кромид во прав, мелената пиперка, италијанските зачини, солта, биберот и чилито. Додадете го сокот и ситно изренданата кора од половина лимон, кои ќе внесат свежина и ќе го балансираат богатиот вкус на останатите состојки.

Во тава загрејте малку масло и печете го пилешкото неколку минути од двете страни, додека не добие привлечна златна боја и не биде целосно термички обработено. Оставете го неколку минути да одмори, а потоа исечете го на помали парчиња или тенки ленти.

Алфредо сосот е тајната на кремастата текстура

Во тенџере растопете 115 грама путер, додајте го ситно сечканиот лук и пржете го само околу 30 секунди – доволно за да ја ослободи аромата, но не и да потемни и да добие горчлив вкус.

Додајте ја павлаката за готвење и загревајте неколку минути на умерена температура. Потоа постепено додавајте го ренданиот пармезан, постојано мешајќи, додека сирењето целосно не се растопи, а сосот не стане мазен, густ и кремаст.

На крајот додајте ги италијанските зачини, биберот и солта по вкус. Со солта сепак треба да бидете внимателни, бидејќи пармезанот е природно солен, а и пилешкото веќе е добро зачинето. Најдобро е прво да го пробате сосот, па дури потоа да одлучите дали му е потребна дополнителна сол.

Три вида сирење за уште побогат слој

Во посебен сад измешајте ги рикотата, 100 грама моцарела, 50 грама пармезан и едно јајце. Додајте црн бибер и лук во прав, па добро соединете ги состојките додека не добиете компактна, кремаста смеса.

Откако пилешкото, Алфредо сосот и сирниот фил се подготвени, останува само најважниот дел – правилното редење на лазањата.

Како се реди пилешката Алфредо лазања?

На дното од садот за печење најпрво распоредете тенок слој Алфредо сос. Врз него наредете листови лазања, а потоа продолжете со слоеви по следниот редослед:

листови лазања – рикота со сирење – пилешко – Алфредо сос – моцарела.

Редете ги слоевите додека не ги потрошите состојките. Завршниот слој треба да биде од листови лазања покриени со поголема количина Алфредо сос, а над него распоредете уште рендана моцарела и пармезан. Токму овој последен слој при печењето ќе се претвори во златна, растопена и крцкава сирна кора.

Внимавајте и на видот на тестенината што го користите. Доколку листовите за лазања според упатството на производителот бараат претходно варење, подгответе ги пред редењето. Ако користите листови кои се ставаат директно во рерна, овој чекор можете да го прескокнете.

Печење и најважниот чекор пред сервирање

Садот покријте го со алуминиумска фолија и печете околу 30 минути на 180 степени. Потоа отстранете ја фолијата и вратете ја лазањата во рерната уште 15 до 20 минути, односно додека сирењето на површината не се растопи и убаво не порумени.

Но, токму тогаш доаѓа делот кој веројатно најтешко ќе го испочитувате: не ја сечете лазањата веднаш.

Оставете ја готовата лазања да отстои 10 до 15 минути. За тоа време сосот и сирењето малку ќе се стабилизираат, па парчињата многу полесно ќе ја задржат формата при сервирањето, додека внатрешноста ќе остане сочна, мека и кремаста.

Со ваква богата лазања навистина не ви се потребни многу прилози. Едноставна зелена салата со киселкаст прелив е сосема доволна за да создаде контраст со путерот, павлаката и трите вида сирење и да го направи оброкот поурамнотежен.

Ако барате рецепт за ручек по кој речиси сигурно ќе следи прашањето „Има ли уште едно парче?“, тогаш ова е едно од оние јадења што вреди да го зачувате – особено за првиот постуден викенд кога ви се јаде нешто топло, кремасто и навистина раскошно.