Поради оваа грешка бојата на ѕидовите пука и се лупи многу брзо

Свежо бојадисан ѕид може веднаш да го освежи домот. Но многумина прават иста грешка: кога ќе се појават дамки, пукнатини или избледени делови, само нанесуваат нов слој боја врз стариот.

На прв поглед, просторијата изгледа средена. Но ако подлогата е влажна, оштетена или лошо исчистена, проблемот брзо се враќа. Бојата почнува да пука, да се лупи и да се одвојува од ѕидот.

Зошто бојата пука и паѓа?

Не постои точен број што кажува колку пати еден ѕид може да се вароса или бојадиса. Некои ѕидови можат да издржат повеќе слоеви без проблем, а кај други оштетувањата се појавуваат многу порано.

Клучот е во состојбата на подлогата. Ако ѕидот е сув, здрав и добро подготвен, новата боја ќе се врзе подобро и ќе трае подолго.

Но ако бојата се нанесува врз стар слој што веќе се лупи, врз прашина, маснотија или влажна површина, ни најквалитетната боја нема да даде добар резултат.

Влагата е најголемиот непријател

Влагата е една од најчестите причини за пукање и лупење на бојата. Кондензација во кујна или бања, протекување од инсталации или слаба изолација можат да направат бојата да набабри и да се одвои од ѕидот.

Кога се појавуваат меурчиња, темни дамки или мувла, проблемот не е само естетски. Во таков случај, прво треба да се открие причината за влагата, а дури потоа да се размислува за ново бојадисување.

Знаци дека не е доволен само нов слој боја

Ако на ѕидот има лупење, пукнатини, меурчиња или бел кредест траг што останува на раката кога ќе го допрете, тоа е знак дека подлогата не е стабилна.

Внимание бараат и дамки што не се отстрануваат со миење, избледени површини изложени на сонце, како и темни мрли во аглите и влажните простории.

Во вакви ситуации, новото бојадисување може само привремено да го покрие проблемот. По кратко време, оштетувањето повторно ќе се појави.

Како правилно се подготвува ѕидот?

Кога старите слоеви се одвојуваат, прво треба да се отстранат со шпакла. Потоа површината се бруси за да се израмни и да се обезбеди подобро прилепување на новиот слој.

Пукнатините и дупките се пополнуваат со маса за глетување. По сушењето, ѕидот повторно се бруси, а потоа темелно се чисти од прашина.

Ако има масни дамки, тие треба да се отстранат со благ детергент. Последниот чекор е нанесување импрегнација или основен премаз, кој ја зацврстува подлогата и помага завршната боја да трае подолго.

Колку често треба да се бојадисуваат просториите?

Кујните и бањите, поради влага, пареа и маснотии, најчесто бараат освежување на секои три до четири години.

Ходниците и скалите се користат почесто и побрзо се валкаат, па обично се бојадисуваат на секои две до три години.

Дневните и спалните соби може да издржат подолго, најчесто пет до седум години, во зависност од квалитетот на бојата, сончевата изложеност и состојбата на ѕидовите.

Мувлата не е само грда дамка

Лупењето на бојата понекогаш открива подлабок проблем: влага и мувла. Тие не треба да се покриваат со боја, бидејќи така само се одложува решението.

Мувлата може да предизвика иритација, кашлање, затнат нос, црвенило на очите и да ги влоши симптомите кај луѓе со астма или алергии. Особено внимателни треба да бидат семејствата со деца, постари лица и лица со послаб имунитет.

И квалитетот на бојата е важен

Поквалитетните бои обично имаат подобра покривност, полесно се одржуваат и се поотпорни на абење. Но дури и најдобрата боја нема да помогне ако ѕидот е влажнo оштетен или нечист.

Кај чувствителни лица, одредени неквалитетни премази можат да предизвикаат непријатност поради испарувања, па при избор е добро да се внимава на декларацијата и да се проветрува просторијата за време и по бојадисувањето.

Затоа пред секое ново бојадисување прво треба да се најде причината за оштетувањето. Ѕидот не може бесконечно да се покрива со нова боја ако под него проблемот останува ист.