Раскошна торта „Шпански ветер“ со ореви и чоколадо – совршена за славската трпеза

Потребни состојки за совршен десерт

За подготовка на трите кори вкупно ќе ви бидат потребни 9 белки. За секоја кора поединечно се матат по 3 белки, 3 лажици шеќер, 3 лажици сечкани ореви или лешници, 1 рамна лажица мелени бисквити или брашно и неколку капки оцет или сок од лимон.

За основниот фил потребни се 9 жолчки, 150 грама шеќер во прав, 200 грама путер и 150 грама мелени ореви или лешници. За чоколадниот дел одвојте дополнителни 100 грама чоколадо за готвење и 50 грама путер. За декорација подгответе 300 мл слатка павлака (или шлаг) и сечкани ореви.

Подготовка на корите и филување

Рерната загрејте ја на 130 до 140 степени, а плехот (со димензии 22х30 см) обложете го со хартија за печење. Изматете три белки во цврст снег, постепено додавајте го шеќерот, а потоа со шпатула лесно измешајте ги оревите, бисквитите и оцетот. Смесата рамномерно распоредете ја во плехот и сушете ја кората 40 до 45 минути. Постапката повторете ја уште двапати за да добиете три кори кои потоа треба целосно да се изладат.

Жолчките и шеќерот во прав варете ги на пареа 15 до 20 минути додека не се згуснат, па изладете ги. Пенасто изматете го омекнатиот путер и соединете го со изладените жолчки. Добиениот крем поделете го на два дела: во поголемиот додадете ги мелените ореви, а во помалиот стопеното чоколадо соединето со 50 грама путер.

На првата кора нанесете половина од филот со ореви, ставете ја втората кора и премачкајте ја со чоколадниот фил. Поставете ја третата кора и целата торта (вклучително и страниците) премачкајте ја со остатокот од филот со ореви. На крајот, декорирајте со изматена слатка павлака и посипете со ореви.

„Тортата ‘Шпански ветер’ е најдобро да се подготви еден ден претходно и да се остави во фрижидер најмалку 24 часа. За тоа време корите ќе омекнат, филовите ќе се стегнат, а вкусовите на оревите и чоколадото целосно ќе се соединат“, советуваат искусните слаткари.