Режисерот што го налути Техеран: Го сними филмот во тајност, сега Франција го кандидира за Оскар

Репресија врз уметноста: Лауреатот на „Златна палма“ Џафар Панахи осуден на затвор во Иран поради „пропаганда“

Познатиот ирански режисер Џафар Панахи (65), кој е овогодишен добитник на престижната „Златна палма“ на Канскиот филмски фестивал, е осуден во отсуство на една година затвор од страна на судот во Техеран. Според иранската новинска агенција ИСНА, режисерот е прогласен за виновен за „пропагандни активности“ против режимот. Покрај затворската казна, судот му изрече и дополнителни ригорозни мерки: двегодишна забрана за патување и забрана за членство во какви било политички или општествени групи, со што се обидуваат целосно да го изолираат од јавниот живот.

Филмот сниман во тајност е кандидат за Оскар, а режисерот е во бегство?

Панахи го освои светот со својот најнов филм „Еден обичен инцидент“, кој е инспириран токму од неговите лични искуства со затворот и државната репресија, а бил снимен во целосна тајност вклучувајќи и интервјуа со други затвореници. Додека Техеран го осудува, светот го слави – филмот е избран од Франција како официјална номинација за Оскар. Моменталната локација на Панахи е непозната; тој минатиот месец беше на турнеја низ САД (Лос Анџелес, Њујорк) за промоција на филмот, што отвора прашања дали воопшто ќе се врати во татковината за да ја отслужи казната.