ТУЖБА ТЕШКА 1 МИЛИЈАРДА ДОЛАРИ: Трамп бара отштета, повлекување на филмот и јавно извинување од Би-Би-Си

Американскиот претседател Доналд Трамп ѝ се закани на британската јавна телевизија Би-Би-Си со тужба од 1 милијарда долари поради лажно монтиран говор прикажан во документарец од октомври 2024 година.

Контроверзниот клип, емитуван само недела пред претседателските избори во САД, го прикажал Трамп како ги повикува своите поддржувачи на насилни акции во Капитол. Во писмо испратено на 9 ноември, адвокатот на Трамп, Алехандро Брито, ги навел трите услови за повлекување на тужбата: целосно повлекување на документарецот, јавно извинување и финансиска отштета. Портпаролот на Би-Би-Си кусо изјави дека писмото ќе биде „разгледано навремено“.

Повеќе од само тужба – оставки во Би-Би-Си

Ситуацијата се продлабочи откако претседателот на Би-Би-Си, Самир Шах, призна „грешка во проценката“ и се извини до јавноста, признавајќи дека монтажата оставила „впечаток на повик за насилство“. Поради скандалот, оставки поднесоа генералниот директор Тим Дејви и уредничката на вестите Дебора Тернес.

Додека ветеранот Џонатан Димблби изјави дека Би-Би-Си му должи на Трамп само извинување (а не пари), поранешниот правен дописник Џошуа Розенберг смета дека спогодба е најреален исход за медиумот. Британската влада застана зад корпорацијата, но порача дека Би-Би-Си „мора да ја одржува довербата и веднаш да ги исправи грешките“.