Актерка удри по Рама, тужба за „кражба“ на лице и глас за виртуелната министерка Диела

Албанска актерка тврди дека владата на Еди Рама ѝ го „позајмила“ лицето и гласот без дозвола за Диела, виртуелна министерка создадена со вештачка интелигенција, па поднесе тужба за, како што наведува, „непоправлива штета“

Албанската актерка Анила Биша поднесе тужба против Владата на Албанија, тврдејќи дека нејзиното лице и глас продолжиле да се користат без одобрение за виртуелниот лик Диела, „министерка“ создадена со помош на AI. Според неа, ова користење излегло надвор од условите што првично ги прифатила и сега предизвикува сериозна штета врз нејзиниот професионален и личен интегритет.

Каде настанал спорот, договорот истекол на 31 декември

Биша наведува дека договорот што го имала со властите се однесувал само на платформата е-Албанија, и дека истиот истекол на 31 декември. По истекот, тврди таа, нејзината слика и глас продолжиле да се користат, без нова согласност и без јасно дефинирани услови, што според неа претставува незаконско продолжување на употребата на нејзиниот идентитет.

Кого тужи и што бара, стопирање на користењето додека трае постапката

Тужбата е насочена кон Владата, лично кон Еди Рама, кон приватната компанија со која имала договор, како и кон НАИС (Националната агенција за информатичко општество). Актерката бара институциите да престанат да ја користат нејзината слика и глас, и дополнително побарала привремена мерка користењето да се стопира додека случајот не добие судска разврска.

Контекстот што ја прави приказната уште поекспонирана е фактот дека „виртуелната министерка“ Диела беше јавно претставена во септември 2025, како проект што треба да биде „неподмитлив“ и „ефикасен“ во јавните набавки, а подоцна доби и признание Future Fit Seal на Светскиот самит на влади во Дубаи