БЕЗ МИЛОСТ ВО ХАГ: Судот го одби Ратко Младиќ – иако е на крајот од животот, останува во затвор!

Судот на Обединетите нации за воени злосторства во Хаг донесе одлука која стави дефинитивна точка на правните маневри на одбраната на Ратко Младиќ. Поранешниот командант на силите на босанските Срби, кој моментално има 84 години, ќе остане зад решетките до крајот на својот живот, откако неговото барање за предвремено ослободување од хуманитарни причини беше експлицитно одбиено. Судот остана глув на барањата за сочувство, со порака дека тежината на неговите дела не дозволува отстапки, без оглед на неговата биолошка сосотојба.

Одбраната на Младиќ со месеци ја брануваше јавноста, тврдејќи дека неговото здравје е во критична фаза и барајќи тој итно да биде префрлен во болничка установа каде што се зборува српски јазик. Сепак, хашкиот трибунал пресече – иако Младиќ се наоѓа во „последната фаза од својот живот“, тоа не е правна основа за прекинување на доживотната затворска казна. Во официјалната одлука децидно се наведува дека во затворската единица на ОН во Холандија му е обезбедена комплетно соодветна медицинска нега и дека надвор нема да добие ништо повеќе од она што веќе го има зад решетките.

Геноцидот во Сребреница и опсадата на Сараево: Сенката на минатото која Хаг нема да ја прости

За да се разбере цврстиот став на судот, мора да се потсети на суровата реалност на пресудата од 2017 година, која беше финализирана и потврдена во 2021 година. Ратко Младиќ беше прогласен за виновен за геноцидот во Сребреница, каде брутално беа егзекутирани повеќе од 8.000 бошњачки мажи и момчиња. Покрај тоа, тој сноси директна одговорност за злосторства против човештвото и за повеќегодишниот терор врз цивилното население за време на крвавата опсада на Сараево. За судот, овие факти се премногу тешки за да се мерат со моменталните здравствени поплаки на осуденикот.

Војната во Босна и Херцеговина (1992-1995) однесе над 100.000 човечки животи, а два милиони луѓе беа раселени. Зад тие бројки стојат одлуки кои Хаг реши да ги казни со апсолутна изолација до самиот крај.

Крај на сите илузии: Зошто одлуката од Хаг е порака за целиот Балкан?

Оваа одлука на ОН не е само правен декрет за еден старец во затворска болница, туку и силна политичка порака до целиот регион. Таа ја потврдува непроменливоста на хашките пресуди за најтешките воени злосторства на тлото на поранешна Југославија. Обидите на одбраната да издејствува условно или привремено префрлање во Србија или Република Српска пропаднаа во вода. Институционалниот бедем на ОН покажа дека сметката за настаните од деведесетите мора да се плати до последниот здив, со што се затвора едно од најмрачните поглавја во балканската историја.