Денеска го чествуваме Св. апостол и евангелист Јован Богослов

Eден од најголемите и најважни апостоли на Црквата Христова – Светиот апостол и евангелист Јован. Како „син на громот“, наречен така од Христос, не поради физичка жестокост, туку поради неговата несопирлива љубов кон Бог, Јован е духовен орел кој ги достигнува најголемите височини на богопознанието.

Тој беше неразделно поврзан со Христос, сведочејќи ги најважните настани од Неговиот живот. Присуствуваше на Тајната вечера, ја гледаше Христовата преобразба и остана под Крстот на Голгота заедно со Пресвета Богородица, додека останатите апостоли се разбегаа. По воскресението, Јован продолжи да се грижи за Богородица се до нејзиното успение.

Својата мисија ја продолжи во Ефес, каде што го проповедаше Христовото учење и љубовта што ја носеше во себе. Беше единствениот апостол кој умре природна смрт на возраст над 100 години, во Ефес, оставајќи зад себе безвременски дела: четвртото Евангелие, три апостолски посланија и Откровението. Овие свети текстови го заокружуваат неговото духовно наследство и се дел од канонот на Новиот завет, сведочејќи за неговата длабочина во верата и љубовта.