Никол Кидман во трејлерот на ‘Babygirl’ го освои интернетот – 3 милиони прегледи за само два дена!

А24 го открива еротскиот трилер „Babygirl“ – Никол Кидман и Харис Дикинсон ја освојуваат публиката!

Студиото A24 штотуку го објави официјалниот трејлер за долгоочекуваниот еротски трилер „Babygirl“, во режија на Халина Рејн, со Никол Кидман и Харис Дикинсон во главните улоги. Трејлерот, објавен пред само два дена, веќе собра речиси три милиони прегледи и предизвика лавина од коментари на социјалните мрежи.

Филмот имаше блескава премиера на овогодинешниот филмски фестивал во Венеција, каде што Никол Кидман ја освои престижната награда Volpi Cup за најдобра актерка, потврдувајќи го својот статус како вистинска холивудска икона. Критичарите кои веќе го погледнаа филмот предвидуваат голем успех и номинации за Кидман, а судејќи според коментарите на публиката – очекувањата се високи.

Во „Babygirl“, Кидман игра моќна извршна директорка од Њујорк која балансира меѓу своето семејство и ризичната афера со многу помладиот практикант, кој го толкува Харис Дикинсон. Динамичната хемија меѓу Кидман и Дикинсон дефинитивно ја држи публиката на работ од столот, додека приказната се заплеткува во интрига и страсни моменти.

Покрај Кидман и Дикинсон, импресивната актерска екипа вклучува и имиња како Антонио Бандерас, Виктор Слезак, Софи Вајлд, Вон Рајли, Естер Мек Грегор, Лесли Силва и Аноп Десаи, кои дополнително ја збогатуваат оваа приказна.

Филмот пристигнува во кината на 25 декември и веќе се предвидува дека ќе биде една од најжешките премиери за празничната сезона. Дали сте подготвени за трилерот кој ќе ви ги помати чувствата и ќе ве остави без здив?