Повеќе од само проја, тајната на празот ја прави најсочната посна погача

Кој го сака мирисот на свежо печена проја, сигурно не може да одолее и на овој рецепт.

Како што е време на постот, многумина бараат идеја за вкусен, брз и лесен оброк кој ќе одговара и за појадок и за вечера. Затоа ви носиме рецепт за совршена посна проја со праз – едноставна, сочна и неодоливо мирисна!

Состојки за посна проја со праз:

• 2-3 страка праз
• 250 г пченично брашно
• 200 г пченкарно брашно (палента)
• 1 прашок за печиво
• 100 мл масло
• околу 200 мл кисела вода (или колку што е потребно да се добие смеса)
• сол по вкус

Подготовка:

1. Во еден сад сипете ги двете брашна, прашокот за печиво и солта.
2. Додадете ги маслото и киселата вода. Добро промешајте со жица за да добиете мазна смеса, малку погуста од онаа за палачинки.
3. Празот исчистете го, исечкајте го ситно и по желба можете кратко да го пропржите на малку масло за да омекне и да пушти уште повеќе арома.
4. Додадете го празот во смесата со брашно и повторно измешајте.
5. Загрејте ја рерната на 200 степени.
6. Истурете ја смесата во намрсена тава за печење. Протресете ја тавата и удрете ја неколку пати од работната маса за смесата да се распореди рамномерно и да излезе вишокот воздух.
7. Печете околу 20-тина минути, односно додека не добие убава златно-кафеава коричка. Ако рерната ви е послаба, продолжете го печењето уште 10 минути.

Послужете ја топла со чаша јогурт (ако не постите) или со ајвар.