‘Скопје ќе биде украсено како што заслужува’: Големото ветување на Орце Ѓорѓиевски

По ‘мрачните’ зими, Орце Ѓорѓиевски вети: Скопје ќе свети како европска метропола за Нова Година

По неколку бледи, безлични и темни зими кои ги принудија скопјани да ја бараат празничната магија во соседните метрополи, новиот градоначалник Орце Ѓорѓиевски најави дека Скопје конечно ќе добие новогодишно украсување и прослава каква што заслужува. Во своето гостување на МРТВ, Ѓорѓиевски откри дека во буџетот што го наследил воопшто не биле предвидени средства за оваа намена, но дека тоа е исправено со новиот ребаланс.

„Со ребалансот на буџетот кој ќе се усвои во петок, ќе бидат обезбедени средства за украсување на главниот град. Исто така, ќе биде организирана новогодишна прослава која ќе им овозможи на граѓаните достоинствен пречек на Новата година“, изјави Ѓорѓиевски.

Враќање на празничната душа на градот

Во изминатите години, Скопје често беше предмет на потсмев поради недостатокот на празнична атмосфера, што беше во остар контраст со китењето во другите европски градови. Оваа промена, според градоначалникот, е клучна за да се врати духот на градот.

„Со ова, Скопје конечно ќе биде украсено како што треба и како што заслужуваат нашите граѓани“, нагласи тој. Целта, како што рече, е градот да ја врати својата „новогодишна душа и топлина, што одамна ја немал“. Со ова ветување, Ѓорѓиевски најавува дека оваа година, наместо да патуваат во странство за да ја почувствуваат празничната бајка, скопјани ќе можат да ја доживеат дома.