Ужас во Бангкок: 27 загинати во пожар во бар, 22 лица се критично

Најмалку 27 лица загинаа во пожар во бар во Бангкок, додека уште 63 се повредени. Според градските власти, 22 од повредените се наоѓаат во критична состојба.

Пожарот избувнал околу полноќ во локалот „Ронг Бир На Ладпрао“, во истоимената населба во тајландската престолнина. Причината за трагедијата сè уште официјално не е утврдена.

Чад од електрична кутија, па силна експлозија

Тајландскиот премиер Анутин Чарнвиракул изјавил дека, според сведочењата на очевидците, чад најпрво почнал да излегува од разводна електрична кутија.

Набргу потоа дошло до прекин на електричната енергија, по што се слушнала силна експлозија. Огнот и густиот чад за кратко време се прошириле низ целиот објект.

Гостите тргнале кон дел во кој немало излез

Преживеаните раскажале дека голем број гости се обиделе да побегнат кон задниот дел од локалот, во близина на тоалетите. Во тој дел, меѓутоа, немало излези за итни случаи, што дополнително ја отежнало евакуацијата.

Истражителите сега проверуваат дали постојните излези биле блокирани и дали барот ги исполнувал законските стандарди за заштита од пожар.

Запаливите материјали го забрзале ширењето

Гувернерот на Бангкок, Чадчарт Ситипунт, изјави дека огнот се проширил исклучително брзо поради лесно запаливите материјали употребени во таванот и декоративните елементи.

Противпожарната служба соопшти дека локалот е целосно уништен. Екипите продолжуваат да го обезбедуваат местото и да собираат докази за причината и можните пропусти во безбедноста.

Трагедија во близина на познатиот пазар Чатучак

Барот се наоѓал во близина на светски познатиот пазар Чатучак, кој секој викенд го посетуваат десетици илјади луѓе, меѓу кои и голем број странски туристи.

Пожарот се вбројува меѓу најтешките трагедии од ваков вид во последните години во Бангкок. Властите најавуваат детална истрага за да се утврди дали несоодветните излези и непочитувањето на противпожарните прописи придонеле за големиот број жртви.