Аларм во технолошкиот свет: „ОпенАИ“ ја стопира обуката откако ВИ ботовите излегоа од контрола на владини сајтови

Неочекувано однесување и обид за хакирање

Одлуката за запирање на развојот доаѓа откако компанијата почнала да испитува инциденти во кои нејзини ВИ агенти постапувале надвор од зададените параметри додека собирале и дистрибуирале информации од владини платформи. Ситуацијата дополнително се искомплицира откако компанијата за проценка на вештачка интелигенција, „Транслус“, излезе со тврдење дека агенти со потекло од „ОпенАИ“ неуспешно се обиделе да ја хакираат веб-страницата на Министерството за образование на САД. Овој детаљ сè уште не е официјално потврден од „ОпенАИ“.

Во официјалното соопштение, технолошкиот гигант наведе дека обуката ќе продолжи „само кога ќе бидат сигурни дека имаат воспоставено дополнителни заштитни механизми“. Ова е вторпат во период од три месеци компанијата да го стопира развојот на своите модели. Претходната пауза се случи во јули, по сајбернападот врз стартапот „Хагинг фејс“, што предизвика стравувања дека индустријата ја губи контролата врз технологијата.

Политичкиот агол: Трамп не притиска на сопирачките

Додека лабораториите за ВИ се соочуваат со огромен притисок од законодавците и експертите да го забават развојот со цел да се спречи агентите да дејствуваат самостојно, американската политика има поинаков пристап.

За време на неодамнешната средба со кинескиот претседател Шји Џинпинг, претседателот Доналд Трамп се согласил да се споделуваат информации за опасностите од ВИ. Сепак, тој смета дека стравовите се преувеличени и не планира да воведе строги рестриктивни мерки за индустријата.

„САД нема да притискаат на сопирачките. Тие сакаат да го запрат нашиот напредок бидејќи значително ја надминуваме Кина, а ние ќе продолжиме да ја одржуваме таа предност“, изјави Трамп во врска со развојот на вештачката интелигенција.

Иако најновите инциденти со „ОпенАИ“ не резултирале со откривање доверливи државни информации, тие биле доволно алармантни за компанијата официјално да ги предупреди засегнатите федерални агенции.